OPINI olih Ni Luh Putu Mintari Dewi

Ring éra globalisasi sané mangkin, kerasayang énggal pisan parubahan jamané majalan. Sayan ngmajuang sayan ngéwehang rasané. Pajalan idupé wantah sampun titah Widhi. Jelé melahé sami bakat entasin, ngisinin keneh, ngisinin kitan bayu, makejang soroh makita gelahang, makita beli. Makejang bakat dotang. Nanging, ngalih gaé lan ngalih apang nyidayang meli, sanget sukeh pesan. Minakadi ngrereh pakaryan sayan méweh. Panekan pipisé seret, nangin pejalan pipisé liu. Yening tusing ngelah timpal utawi kulawarga pejabat, sinah lakar sukeh ngalih gegaén. Makejang soroh “berkepentingan”.

Yening pineh-pinehin sakadi mangkin, korupsi ring panegara Indonesia puniki sayan nglimbak. Puniki patut polih uratian pamerintah, punika taler karma sane siosan. Yening korupsiné puniki “meraja lela” sinah pacang prasida nguugang guminé.

Pinehin manten, panegara Indonésia nanggung utang sané akéh pisan krana ulah para pejabat utawi pegawé pamerintah sané korupsi. Lianan sapunika rakyat Indonesiané sami sengsara antuk ulah para koruptor punika. Manusa sané nglaksanayang korupsi nika santukan parisolah sane konsumtif. Ipun setata “magaya” idup mewah tan ngerasa yening penghasilan sané kapolihang nénten prasida ngaénang ipun ngrasayang idup sané méwah. Antuka sapunika ipun nglaksanayang pabuat korupsi punika, apanga prasida hidup méwah tur bungah.

Sané  kaping kalih krana faktor sosialpolitik, lan lingkungan sané ngranayang ipun mlaksana pabuat korupsi punika. Korupsi sané wénten ring Indonésia  sané mangkin punika nyansan nglimbak santukan hukum ring panegara Indonésia puniki lemah utawi puntul.

Pikobet puniki prasida katepasin yéning pamerintah prasida  tegas lan satinut ring hukum sane wénten.  Mangdané  nénten malih wénten manusa sané pacang nglaksanayang korupsi ring guminé. Sayan ngakehang korupsiné, sayan sengsara kramané, sayan uug guminé.

Majeng ring krama sinamian, patut éling ring raga sapunapi ngendaliang égo soang-soang diri. Ngekang hawa nafsu lan momo angkara pacang idup méwah. Ngiring instropéksi angga sarira soang-soang nyalanin paduman idup malarapan antuk ngastiti bakti ring Hyang Widhi mangda guminé sutrepti nénten wénten malih korupsi.

 

Ni Luh Putu Mintari Dewi

embas ring Nagasari, 7 Mei 1997, dados mahasisia semester VII, ring Prodi Pendidikan Bahasa Bali,  STKIP Agama Hindu Amlapura

Leave A Comment

All fields marked with an asterisk (*) are required

Hubungi kami di WhatsApp
1