SULUH PEJABATÉ MANGKIN
olih: I Putu Diarsana
Idup di jamané jani
Jaman sané katah kabaos
Jaman kaliyuga
Ané selem bisa dadi putih
Ané putih bisa dadi selem
Makasami campah
Tengah kelawan sisi
Tusing ada misi
Tusing karuan beneh
Tusing karuan pelih
Ané joh ngenahné luung
Ané di muncuk cunguhé tusing mebo
Liunan taluh semuuk
Tusing taén masuluh ngapung
Matumpung
Puyung
Parisolah ngenahné luung
Pamuputné payu ulung
Macelempung
KÉLANGAN KURSI
olih: I Putu Diarsana
Ngelut keneh
Kélangan kuasa
Ngelut momo
Kélangan harta
Ngulurin indria corah
Kélangan kursi
Ngumambang kidung
Suara lan laksana tuara adung
Ngelarang corah
Kala kuasa
Doh doh sawat
Marawat-rawat ngarat lawat korupsi
Korupsi ring ati tuara keni kaaksi
Korupsi ring gumi matah tiang sampun kélangan kursi
Tusing pesan dadi kelidin
Sinah mangkin tiang ring jeruji besi
Pejalan mula pejalan
Tis kalawan panes
Utama lawan nista
Nika sané tiang rasayang mangkin
Kélangan kursi
Ulian korupsi
I Putu Diarsana
embas ring Geliang, 29 Januari 1976, dados mahasisia semester VII, ring Prodi Pendidikan Bahasa Bali, STKIP Agama Hindu Amlapura
Hubungi kami di WhatsApp