ISIN GUMI (1)

olih: I Wayan Budiasa

Kenyemné manis

Munyiné masih manis

Masepuk buka mesin  diésel baangin solar

Ngrépét buka apiné gedé téngkobin baan uyah

 

Pipis…

Anaké buta ulian pipis

Anaké buduh ulian pis

Pipisé buka bukit ngaénang kenehné tis

 

Jemak?

Tusing ngitungang pipis gelah braya

Tusing ngitungang pipisé gelahang negara

Né kenehang pipisé pang bakat jani

 

Tusing ngenehang nyén lakar makenta

Tusing kakenehang…

Né penting déwékné lega

 

Makudang proyék mangkrak

Nanging kantongé madongkrak

Lega?

 

ISIN GUMI (2)

olih: I Wayan Budiasa

Kedekné ngakak

Proyékné mangkrak

Kantong

Basangné bengkak

Negakin kursi emas lan perak

Isin kantong maburarak

 

Kadi najuk punyan biu di panegalan

Nancebang apuun lantas ngeliunang

Keto masih korupsi

Korupsi di guminé tusing ja lakar ilang

Nanging sayan ngliunang

 

Korupsi

Pidan lakar ilang?

Pidan kadén

Yéning nu demen ngisinin momo

 

I Wayan Budiasa

embas ring Tumingal, 24 Juli 1996, dados mahasisia semester VII, ring Prodi Pendidikan Bahasa Bali, STKIP Agama Hindu Amlapura

Leave A Comment

All fields marked with an asterisk (*) are required

Hubungi kami di WhatsApp
1