BUBUH
Olih: I Wayan Mardana Putra
Eling kawéntenan, déwéké tuna…
Eling kawéntenan, déwéké tuna…
Eling kawéntenan, déwéke tuna…
Tuna di arta, kajekjek, kalilig Sang maguna daya!
Tuah mabekel tatal, masaput tanah, mabaju kampil
Ubuh déwéké, tan kodag ban ngangganin…
Sajan gedé Kotané, gedé masih ahamkarané
Sajan maprada umahné, maprada masih kenehné
Sajan masih sugih artané, nanging tiwas atiné!
Deweké ane ubuh ené, tuah saksi
Nolih angga nginyukang pipis!
Nolih angga mandus pipis!
Aduh… Ruet.. Ruet… Ruet pada maguna kaya!
Eling kawéntenan, déwéké tuna…
Diastun tuna. Pulesé aris. Diastun sugih pules makrangkeng!
Jik…Ping!!!
Kanggoang bubuh!
Bubuhé jani suba sayan embon..
Bubuhé jani masisa buin a kau…
Dija buin ngalih bubuh?
Mani buin kenehang! Mani buin mamesik…
KERTAS?
Olih : I Wayan Mardana Putra
Lucu guminé jani… Yen tingalin lucu gati…
Kertas?
Kertas begeh mawadah tas…
Kertas begeh sing lémpas!
Hééy!
Pingit sajan ento, tusing dadi kéto.
Kertas? Ao, ento kertas…
Tusing ngidayang resepin…
Apa ané ngaé pada nguberin?
Minab kertasé kagambarin,
Para pahlawan duk riin!
Aduuuhhh!!!
Sedih minab pahlawané!
Kagambar di kertasé kaplaibang ka café.
Malila cita sambil tunggang tungging…
Nyén to? Sing tawang!
Déwéké dini masih ngaba kertas..
Kertas magambar Frans Kaisepo..
Tukar ban goréngan…
Ia, ngaba kertas mawadah tas
Tukar ban krangkéngan…
Lucu gati isin gumine jani, minab Kali Yuga.
Tabik!!!
I Wayan Mardana Putra
embas ring Denpasar pinanggal 8 Maret 1998,
dados mahasisia semester VII, ring Prodi Pendidikan Bahasa Bali,
STKIP Agama Hindu Amlapura
Hubungi kami di WhatsApp