BIKAS SAMONG
olih: Ni Luh Putu Sutikawati
#1
Mapi-mapi belog lara
Nyaruang bikasé lobha
Sekadi tanpa dosa
Kalilit momo angkara
ditu di ambeké dalem ati
bek misi daya lelipi
Ngamokohang awak pedidi
yadiastun ada ané idupné kalara tan kadi-kadi
idup ngisinin basang
apang makejang dadi gelahang
lan makejang tampedang
lan jani melahang ngampilang
yadiastun tawang ento jalan iwang
yadiastun ento dong bagian
jalan jani énggal juang
rampok jemak juang makejang
lebeng besik énggal penékang
ada besik jalan saubang
anggo kesugihan lah juang
sinah enggal lakar juk pecalang
#2
Jalan juang
Juang makejang
Sing perlu sisaang
Né penting suba mapunduh di basang
Sengsarané rakyaté nampedang
Karmapalané I jadma corah makatang
Bikas samong
Buka méong garong
Marebutin balung tusing ngelah omong
Ni Luh Putu Sutikawati
embas ring Pidpid, 15 November 1981, dados mahasisia semester VII ring Prodi Pendidikan Bahasa Bali, STKIP Agama Hindu Amlapura
Hubungi kami di WhatsApp